‘Atlas Angel II’ පුහුණුව හරහා ආපදා ප්‍රතිචාර සූදානම ශක්තිමත් කිරීමට ඇමරිකාව සහ ශ්‍රී ලංකාව

මහා පරිමාණ ආපදාවන්ට කාර්යක්ෂමව ප්‍රතිචාර දැක්වීමේ සූදානම සහ හැකියාව ශක්තිමත් කිරීමේ අරමුණින් ඇමරිකා එක්සත් ජනපදය සහ ශ්‍රී ලංකාව එක්ව ‘Atlas Angel II’ පුහුණු අභ්‍යාසය අද (31) ආරම්භ කරයි.

අගෝස්තු 31 සිට සැප්තැම්බර් 4 දක්වා පැවැත්වෙන මෙම පුහුණුවේදී C-130 ගුවන් යානා නඩත්තුව, නාගරික සෙවීම් හා මුදාගැනීම්, සිද්ධි පාලන පද්ධති, ඉදිකිරීම් ඉංජිනේරු කටයුතු, නායයෑම්වලදී මුදාගැනීමේ මෙහෙයුම් මෙන්ම රසායනික, ජීව විද්‍යාත්මක, විකිරණශීලී, න්‍යෂ්ටික සහ පුපුරණ ද්‍රව්‍ය ආශ්‍රිත අවදානම් සඳහා ප්‍රතිචාර දැක්වීම ඇතුළු ක්ෂේත්‍ර ගණනාවක් සම්බන්ධයෙන් විශේෂඥ දැනුම හුවමාරු කරගැනීම සහ ඒකාබද්ධ පුහුණු කටයුතු සිදු කෙරේ.

ශ්‍රී ලංකා ගුවන් හමුදාව සහ ඇමරිකානු පැසිෆික් ගුවන් හමුදාවට අමතරව, මොන්ටානා ජාතික ආරක්ෂක බලකායේ කණ්ඩායම්ද මෙම පුහුණුවට සහභාගී වෙති. ගුවන් හමුදා බ්‍රිගේඩියර් ජෙනරාල්වරයාගේ සහකාර ප්‍රධාන පරිපාලන නිලධාරී ට්‍රේස් තෝමස් සහ යුද හමුදා බ්‍රිගේඩියර් ජෙනරාල්වරයාගේ සහකාර ප්‍රධාන පරිපාලන නිලධාරී රිනේයා ටෝර්වල්ගේ නායකත්වයෙන් එම කණ්ඩායම් සහභාගී වෙති. එක්සත් රාජධානිය සහ බංග්ලාදේශය නියෝජනය කරන නිලධාරීන් මෙම පුහුණුව නිරීක්ෂණය කිරීමට නියමිතය.

කටුනායක පිහිටි ශ්‍රී ලංකා ගුවන් හමුදා කඳවුර කේන්ද්‍ර කරගනිමින් පැවැත්වෙන මෙම පුහුණුවේ ඇතැම් වැඩසටහන් මහනුවරදීද පැවැත්වේ. මානුෂීය ආධාර සැපයීම සහ ආපදා මුදාගැනීමේ මෙහෙයුම්වලදී ඇමරිකානු සහ ශ්‍රී ලංකා හමුදා අතර ප්‍රායෝගික සහයෝගීතාව සහ ඒකාබද්ධ මෙහෙයුම් හැකියාව ශක්තිමත් කිරීම මෙහි ප්‍රධාන අරමුණයි.

“ආපදා ඇතිවන අවස්ථාවලදී ඒවාට ප්‍රතිචාර දැක්වීමට සූදානම්ව සිටීම සම්බන්ධයෙන් ඇමරිකාව සහ ශ්‍රී ලංකාව පොදු අවධානයක් බෙදා ගනී. ඇමරිකානුවන් සහ ශ්‍රී ලාංකිකයන් විශේෂඥ දැනුම බෙදා ගනිමින්, එකිනෙකාගෙන් ඉගෙන ගනිමින් සහ එකට පුහුණු වීම හරහා අපගේ හවුල්කාරිත්වය ප්‍රායෝගිකව ශක්තිමත් කරමින් සිටිනවා” යැයි ඇමරිකානු තානාපති එරික් මයර් මහතා පැවසීය.

ශ්‍රී ලංකා ගුවන් හමුදාපති එයාර් මාර්ෂල් බන්දු එදිරිසිංහ මහතා සඳහන් කළේ ස්වභාවික ආපදාවන්ට දේශසීමා නොමැති බවත්, මානුෂීය ආධාර සහ ආපදා සහන මෙහෙයුම් ශක්තිමත් කිරීම සඳහා විවිධ රටවල් එක්ව කටයුතු කිරීම වැදගත් බවත්ය.

හදිසි තත්ත්වයන් ඇතිවීමට පෙර ඒකාබද්ධ පුහුණු කටයුතු සිදු කිරීමෙන් සැබෑ අර්බුදකාරී තත්ත්වයන්හිදී සන්නිවේදනය, සම්බන්ධීකරණය සහ කාර්යක්ෂම ප්‍රතිචාර දැක්වීමේ හැකියාව ශක්තිමත් වන බවද සඳහන් කර ඇත.

2025 දෙසැම්බර් මාසයේ ඇති වූ ඩිට්වා සුළි කුණාටුවේදී මෙම සහයෝගීතාවයේ වැදගත්කම පැහැදිලි වූ අතර, බලපෑමට ලක් වූ ප්‍රජාවන්ට අත්‍යවශ්‍ය සැපයුම් හා සහාය ලබාදීම සඳහා ඇමරිකානු සහ ශ්‍රී ලංකා හමුදා එක්ව කටයුතු කළහ. එහිදී සැපයුම් බෙදාහැරීම සඳහා ඇමරිකානු ගුවන් හමුදාවේ C-130J Super Hercules ගුවන් යානා දෙකක්ද භාවිත කරන ලදී.

ඇමරිකානු ආරක්ෂක දෙපාර්තමේන්තුවේ State Partnership Program වැඩසටහන යටතේ මොන්ටානා ජාතික ආරක්ෂක බලකාය සහ ශ්‍රී ලංකාව අතර හවුල්කාරිත්වය 2021 වසරේදී ආරම්භ කෙරිණි. 2025 නොවැම්බර් මාසයේ අත්සන් කරන ලද අවබෝධතා ගිවිසුමක් මගින් ආපදා ප්‍රතිචාර, ගුවන් සේවා සහ සමුද්‍රීය ආරක්ෂාව ඇතුළු ක්ෂේත්‍රවල සහයෝගීතාව තවදුරටත් විධිමත් කර ඇත.

මෙම වැඩසටහනට සමගාමීව ඇමරිකානු පැසිෆික් ගුවන් හමුදා සංගීත කණ්ඩායමේ සාමාජිකයන් ශ්‍රී ලාංකික සංගීත ශිල්පීන් සමඟ එක්ව සංගීත ප්‍රසංගයක්ද පැවැත්වීමට නියමිතය.

ගිනිගැනීම්, ගංවතුර සහ අනෙකුත් හදිසි අවස්ථාවන්ට ප්‍රතිචාර දැක්වීම පිළිබඳ මොන්ටානා ජාතික ආරක්ෂක බලකායේ අත්දැකීම් සහ ආපදා ප්‍රතිචාර සම්බන්ධයෙන් ශ්‍රී ලංකාවේ අත්දැකීම් හුවමාරු කරගැනීම හරහා දෙරටේ ආපදා සූදානම සහ මෙහෙයුම් හැකියාව තවදුරටත් ශක්තිමත් කිරීමට අපේක්ෂා කෙරේ.