இசையமைப்பாளர் ‘தேனிசைத் தென்றல்’ தேவா காலமானார்
தமிழ்த் திரையிசையுலகின் மூத்த இசையமைப்பாளரும், ‘தேனிசைத் தென்றல்’ என ரசிகர்களால் அன்புடன் அழைக்கப்பட்டவருமான தேவா, தனது 75ஆவது வயதில் சென்னையில் காலமானார். 375க்கும் மேற்பட்ட தமிழ்த் திரைப்படங்களுக்கு இசையமைத்துள்ள அவர், தமிழ்த் திரையிசையில் கானா இசையைப் பிரபலப்படுத்துவதில் முக்கிய பங்காற்றினார். தனித்துவமான இசைப்பாணி மற்றும் காலத்தால் அழியாத பாடல்கள் மூலம் தமிழ் இசை ரசிகர்களின் மனங்களில் நீங்காத இடம்பிடித்துள்ளார்.
editor
தமிழ்த் திரையிசையுலகில் ‘தேனிசைத் தென்றல்’ என ரசிகர்களால் அன்புடன் அழைக்கப்பட்ட மூத்த இசையமைப்பாளர் தேவா (75), உடல்நலக் குறைவு காரணமாக இன்று (சனிக்கிழமை) சென்னையில் காலமானார் எனத் தெரிவிக்கப்பட்டுள்ளது.
1950ஆம் ஆண்டு சென்னையில் தேவநேசன் சொக்கலிங்கம் என்ற இயற்பெயருடன் பிறந்த இவர், பின்னர் தேவா என்ற பெயரில் திரையுலகில் புகழ்பெற்றார். 1986ஆம் ஆண்டு வெளியான ‘மாட்டுக்கார மன்னாரு’ திரைப்படத்தின் மூலம் இசையமைப்பாளராகத் தனது திரையிசைப் பயணத்தை ஆரம்பித்தார்.
தமிழில் 375க்கும் மேற்பட்ட திரைப்படங்களுக்கு இசையமைத்துள்ள தேவா, தெலுங்கு, கன்னடம், மலையாளம் மற்றும் இந்தி உள்ளிட்ட மொழிகளில் உருவான திரைப்படங்களுக்கும் இசையமைத்து இந்திய அளவில் தனக்கென ஓர் இடத்தைப் பிடித்தார்.
தமிழ்த் திரையிசையில் வடசென்னையின் பாரம்பரிய இசை வடிவமான ‘கானா’ இசையை அறிமுகப்படுத்திப் பிரபலப்படுத்தியதில் தேவாவுக்கு முக்கிய பங்கு உண்டு. அவரது இசையில் உருவான பாடல்கள் பல தலைமுறை ரசிகர்களிடையே வரவேற்பைப் பெற்றன.
திரைப்படங்களுக்கு இசையமைத்ததுடன், தொலைக்காட்சித் தொடர்களுக்கும் இசையமைத்த அவர், பின்னணிப் பாடகராகவும் தனது திறமையை வெளிப்படுத்தினார். தனது இசையிலும் ஏனைய இசையமைப்பாளர்களின் இசையிலும் பல பாடல்களைப் பாடியுள்ளார். மேலும், சில திரைப்படங்களில் கௌரவத் தோற்றங்களிலும் நடித்து ரசிகர்களைக் கவர்ந்துள்ளார்.
தொலைக்காட்சி நிகழ்ச்சிகளிலும் பங்கேற்று வந்த தேவா, ஸ்டார் விஜய் தொலைக்காட்சியில் ஒளிபரப்பாகும் ‘சூப்பர் சிங்கர்’ நிகழ்ச்சியின் 10ஆவது பருவத்திலும் சிறப்பு விருந்தினராகக் கலந்துகொண்டார்.
அண்மையில், ஹிப் ஹாப் ஆதி இயக்கத்தில் வெளியான ‘மீசைய முறுக்கு 2’ திரைப்படத்தின் வெற்றி விழாவில் பங்கேற்ற அவர், கானா இசைக் கலைஞர்களைக் கௌரவித்திருந்தார்.
அதனைத் தொடர்ந்து அவருக்கு திடீர் உடல்நலக் குறைவு ஏற்பட்டதால், சென்னையில் உள்ள தனியார் மருத்துவமனையில் சிகிச்சைக்காக அனுமதிக்கப்பட்டதாகத் தெரிவிக்கப்பட்டது. அவர் மாரடைப்பு காரணமாக உயிரிழந்ததாகவும் தகவல்கள் வெளியாகியுள்ளன. எனினும், மரணத்துக்கான உத்தியோகபூர்வ காரணம் உறுதிப்படுத்தப்பட வேண்டியுள்ளது.
1990களில் தமிழ் திரையிசையில் முன்னணி இசையமைப்பாளர்களில் ஒருவராகத் திகழ்ந்த தேவா, தனது தனித்துவமான இசைப்பாணி மற்றும் கானா பாடல்கள் மூலம் தமிழ் இசை ரசிகர்களின் மனங்களில் நீங்காத இடம்பிடித்துள்ளார்.
இசையமைப்பாளர் தேவாவின் இறுதி அஞ்சலி நாளை (ஞாயிற்றுக்கிழமை) மாலை நடைபெறவுள்ளதாகத் தகவல் வெளியாகியுள்ளது. இறுதி நிகழ்வு தொடர்பான மேலதிக விபரங்கள் எதிர்பார்க்கப்படுகின்றன.
