பொருளாதார மீட்சியைத் தாண்டி மாற்றத்தை நோக்கி இலங்கை பயணிக்க வேண்டும்: உலக வங்கி

இலங்கையின் பொருளாதாரம் 2026ஆம் ஆண்டில் 4.4 சதவீதம் வளர்ச்சியடையும் என உலக வங்கி கணித்துள்ளதுடன், 2026ஆம் ஆண்டின் முதல் பாதியில் பொருளாதாரம் 4.7 சதவீதம் வளர்ச்சியடைந்து நெருக்கடிக்கு முந்தைய 2018 ஆம் ஆண்டின் நிலையை மீண்டும் எட்டியுள்ளதாக தெரிவித்துள்ளது. எனினும், நாட்டின் வறுமை விகிதம் இன்னும் 16.9 சதவீதமாக காணப்படுவதுடன், பொருளாதார மீட்சியின் பயன்கள் அனைத்து மக்களையும் சமமாகச் சென்றடையவில்லை எனவும் உலக வங்கி சுட்டிக்காட்டியுள்ளது.

தொடர்ந்து 12 காலாண்டுகளாக பொருளாதாரம் வளர்ச்சி கண்டுள்ள நிலையில், 2027ஆம் ஆண்டில் பொருளாதார வளர்ச்சி 4.2 சதவீதமாக குறையக்கூடும் என உலக வங்கி எதிர்பார்க்கிறது. நெருக்கடிக்குப் பிந்தைய மீட்சி வேகம் குறைவதுடன் உற்பத்தித்திறன் பலவீனமாக இருப்பதே இதற்குக் காரணமாகக் குறிப்பிடப்பட்டுள்ளது.

உலக வங்கியின் ஆறுமாதங்களுக்கு ஒருமுறை வெளியிடப்படும் பொருளாதாரக் கண்ணோட்டத்தின் ஒரு பகுதியாக, “மீட்சியிலிருந்து மாற்றத்தை நோக்கி” என்ற தலைப்பிலான இலங்கை அபிவிருத்தி புதுப்பிப்பு அறிக்கை நேற்று செவ்வாய்க்கிழமை (6) வெளியிடப்பட்டது. 

இதனையடுத்து உரையாற்றிய உலக வங்கி பிரதிநிதிகள், நாட்டின் அடுத்த கட்ட சவால் பொருளாதார மீட்சியைத் தொடர்வது மட்டுமல்ல, பொருளாதாரத்தை மாற்றியமைப்பதாகும் என சுட்டிக்காட்டினர்.

தொழில்துறையின் வலுவான செயல்திறன் மற்றும் சேவைத் துறையின் தொடர்ச்சியான வளர்ச்சி காரணமாக 2026ஆம் ஆண்டுக்கான வளர்ச்சி கணிப்பு முன்னைய மதிப்பீடுகளை விட அதிகரிக்கப்பட்டுள்ளதாக உலக வங்கி தெரிவித்துள்ளது.

எனினும், உலகளாவிய எரிசக்திச் சந்தைகளில் நீடிக்கும் நிலையற்ற தன்மை மற்றும் எதிர்பார்க்கப்படும் எல் நினோ காலநிலை நிகழ்வுகள் உள்ளிட்ட அபாயங்கள் பொருளாதார உற்பத்தித்திறன் மற்றும் உணவுப் பாதுகாப்பை பாதிக்கக்கூடும் என எச்சரிக்கப்பட்டுள்ளது.

இலங்கை மேல் - நடுத்தர வருமானம் கொண்ட நாடாக மீள வகைப்படுத்தப்பட்டிருப்பது முக்கியமான சாதனை எனத் தெரிவித்த உலக வங்கி குழுமத்தின் இலங்கைக்கான பதில் வதிவிடப் பணிப்பாளர்   ஸ்டீபன் மாஸிங், இந்தச் சாதனை ஒரு முடிவல்ல, புதிய ஆரம்பம் எனக் குறிப்பிட்டுள்ளார்.

பொருளாதாரத்தை மாற்றியமைத்து வேலைவாய்ப்புகளை உருவாக்குவதற்கு தற்போதைய வேகத்தை இலங்கை பயன்படுத்திக்கொள்ள வேண்டும் என்றும், விவசாய - உணவுத் துறை போன்ற அதிக வாய்ப்புள்ள துறைகளில் முதலீடு செய்வதன் மூலம் அடுத்த கட்ட வளர்ச்சியை உருவாக்க முடியும் என்றும் அவர் தெரிவித்துள்ளார்.

இலங்கையின் நிதி நிலைமையும் வலுப்பெற்றுள்ளதாக உலக வங்கி தெரிவித்துள்ளது. அரசாங்கத்தின் முதன்மை வரவு - செலவுத் திட்ட உபரி குறிப்பிடத்தக்க அளவில் அதிகரித்துள்ள போதிலும், அண்மைய மாதங்களில் எரிசக்தி மற்றும் உணவுப் பொருட்களின் விலைகள் அதிகரித்ததன் காரணமாக பணவீக்கம் மீண்டும் உயர்ந்துள்ளது.

பொருளாதார மீட்சியை நீடித்த பொருளாதார மாற்றமாக மாற்றுவதற்கு, அரசாங்கச் செலவினத்தை பிரதான வளர்ச்சி இயக்கியாகக் கொண்டிருப்பதிலிருந்து விலகி, தனியார் முதலீடு, ஏற்றுமதி மற்றும் உற்பத்தித்திறன் வளர்ச்சி ஆகியவற்றை பொருளாதாரத்தின் முக்கிய இயக்கிகளாக மாற்ற வேண்டும் என உலக வங்கி வலியுறுத்தியுள்ளது.

இதற்கு சிறந்த உட்கட்டமைப்பு, முதலீட்டுக்கு நிலையான சூழல் மற்றும் முக்கிய பொருளாதாரத் துறைகளில் தனியார் துறையின் அதிக பங்களிப்பு அவசியம் எனவும் தெரிவிக்கப்பட்டுள்ளது.

அதேவேளை,  ஊதியங்கள் இன்னும் நெருக்கடிக்கு முந்தைய நிலையை விடக் குறைவாக இருப்பதாகவும், அதிக வாழ்க்கைச் செலவுகள் ஏழை மற்றும் பாதிக்கப்படக்கூடிய குடும்பங்களை அதிகளவில் பாதிப்பதாகவும் உலக வங்கி தெரிவித்துள்ளது.

இலங்கையின் பொருளாதார வளர்ச்சியின் அடுத்த கட்டத்தை தனியார் முதலீடு, ஏற்றுமதி வளர்ச்சி மற்றும் உற்பத்தித்திறன் அதிகரிப்பு ஆகியவற்றின் மூலம் முன்னெடுக்க வேண்டும் என உலக வங்கி வலியுறுத்தியுள்ளது.

இவ்வறிக்கையில் விவசாய வணிகத் துறைக்கு விசேட கவனம் செலுத்தப்பட்டுள்ளது. முதன்மை விவசாயம் நாட்டின் மொத்த உள்நாட்டு உற்பத்தியில் சுமார் 8 சதவீதத்தை கொண்டுள்ள போதிலும், உணவு பதப்படுத்துதல், விநியோகம், வர்த்தகம் மற்றும் உணவு சேவைகள் உள்ளிட்ட பரந்த விவசாய-உணவு அமைப்பு மொத்த உள்நாட்டு உற்பத்தியில் சுமார் ஆறில் ஒரு பங்கையும், வேலைவாய்ப்பில் 40 சதவீதத்திற்கும் அதிகமான பங்கையும் கொண்டுள்ளதாக உலக வங்கி தெரிவித்துள்ளது.

மேலும், விவசாய வணிகம் இலங்கையின் பொருட்கள் ஏற்றுமதியில் சுமார் 30 சதவீதத்தை கொண்டுள்ளதுடன், அந்நியச் செலாவணி வருவாய் மற்றும் கிராமப்புற வாழ்வாதாரங்களுக்கான முக்கிய ஆதாரமாகவும் விளங்குகிறது.

தேயிலை, தேங்காய், இலவங்கப்பட்டை, கடலுணவு மற்றும் இறப்பர் போன்ற துறைகளில் இலங்கை உலக சந்தைகளில் போட்டியிடும் வலுவான நிலையில் இருப்பதாகவும் உலக வங்கி சுட்டிக்காட்டியுள்ளது.

எனினும், வர்த்தகக் கொள்கை, அரசாங்கச் செலவினம், உட்கட்டமைப்பு மற்றும் நிதிக்கான அணுகல் ஆகியவற்றில் இலக்குவைக்கப்பட்ட சீர்திருத்தங்களை மேற்கொள்வதன் மூலம் விவசாய மதிப்புச் சங்கிலிகளில் புதிய தனியார் முதலீடுகளை ஈர்த்து, குறிப்பாக சிறு விவசாயிகள் மற்றும் கிராமப்புற மக்களுக்கான வாய்ப்புகளை விரிவுபடுத்த முடியும் என தெரிவிக்கப்பட்டுள்ளது.

இதற்காக ஏற்றுமதி சார்ந்த கொள்கைச் சூழலை உருவாக்குதல், திறனற்ற மானியங்களை குறைத்து விவசாய ஆராய்ச்சி மற்றும் காலநிலைத் தாங்குதிறன் கொண்ட தொழில்நுட்பங்களில் முதலீடு செய்தல், தரநிலை உட்கட்டமைப்பு மற்றும் டிஜிட்டல் தடமறிதலை மேம்படுத்துதல், குளிர்சங்கிலி உட்கட்டமைப்பை வலுப்படுத்துதல் மற்றும் நில உரிமை, நிதி அணுகல் தொடர்பான சீர்திருத்தங்களை மேற்கொள்ளுதல் ஆகியவை பரிந்துரைக்கப்பட்டுள்ளன.

இதேவேளை, உலக வங்கியின் தெற்காசிய பொருளாதார புதுப்பிப்பு அறிக்கையின்படி, 2026ஆம் ஆண்டில் தெற்காசியப் பிராந்தியத்தின் பொருளாதார வளர்ச்சி 6.9 சதவீதமாக இருக்கும் என எதிர்பார்க்கப்படுகிறது. வலுவான உள்நாட்டு கேள்வி பிராந்தியத்தை உலகளாவிய பொருளாதார அதிர்ச்சிகளுக்கு மத்தியிலும் தாங்கி நிற்பதாகவும், செயற்கை நுண்ணறிவை ஏற்றுக்கொள்வதன் மூலம் உற்பத்தித்திறன், ஏற்றுமதி மற்றும் அரச சேவை வழங்கலில் புதிய வளர்ச்சி வாய்ப்புகளை உருவாக்க முடியும் என்றும் உலக வங்கி தெரிவித்துள்ளது.