காஸாவை மூச்சுத்திணறச் செய்து உயிர்வாழ்வதற்கான வழிகளை அழிக்கிறது இஸ்ரேல் – எல்லைகளற்ற மருத்துவர்கள் அமைப்பு குற்றச்சாட்டு

காஸா மீதான இஸ்ரேலின் நடவடிக்கைகள் தொடர்ந்து தீவிரமடைந்து வருவதாகவும், மக்களின் உயிர்வாழ்வுக்குத் தேவையான அடிப்படை வசதிகள் திட்டமிட்டு அழிக்கப்படுவதாகவும் Médecins Sans Frontières (MSF) எனப்படும் எல்லைகளற்ற மருத்துவர்கள் அமைப்பு குற்றஞ்சாட்டியுள்ளது.

காஸாவில் மக்கள் வாழக்கூடிய இடம் தொடர்ந்து சுருங்கி வருவதுடன், வன்முறை, அத்தியாவசிய பொருட்களுக்கான தடைகள் மற்றும் சுகாதார கட்டமைப்புகள் உள்ளிட்ட முக்கிய உட்கட்டமைப்புகளின் அழிவு ஆகியவற்றால் உயிர்வாழ்வதற்கான நிலைமைகள் சீரழிந்து வருவதாக எல்லைகளற்ற மருத்துவர்கள் அமைப்பு தெரிவித்துள்ளது.

கடந்த ஒரு வருடத்தில், இஸ்ரேலால் உருவாக்கப்பட்டுள்ள ‘Yellow Line’ எனப்படும் எல்லைக்கோடு காஸா மக்களை உடல் ரீதியாக மேலும் கட்டுப்படுத்தும் நிலையை உருவாக்கியுள்ளதாக அந்த அமைப்பு தெரிவித்துள்ளது. ஆரம்பத்தில் தற்காலிக இராணுவ விலகல் நிலையாகவும், போர்நிறுத்தத்தைப் பேணுவதற்கான நடவடிக்கையாகவும் முன்வைக்கப்பட்ட இந்தக் கோடு, தற்போது இராணுவ நிலைகள் மற்றும் மண் தடுப்புகளால் பலப்படுத்தப்பட்டுள்ளதுடன், இடிப்புப் பணிகளும் தொடர்கின்றன.

எல்லைகளற்ற மருத்துவர்கள் அமைப்பின் தகவலின்படி, இஸ்ரேலிய படைகள் தற்போது காஸாவின் சுமார் 65 சதவீத பகுதியை கட்டுப்பாட்டில் வைத்துள்ளன. Yellow Line தொடர்ந்து மேற்கு நோக்கி நகர்வதால், மக்கள் வாழும் பகுதிகள் மேலும் சுருங்கி வருவதாகவும் தெரிவிக்கப்பட்டுள்ளது.

“Yellow Line என்பதை வெறுமனே ஒரு வரைபடத்தில் உள்ள கோடாகக் கருத முடியாது. அது மக்களைச் சுற்றிவளைப்பதற்கான ஒரு பொறிமுறையாக மாறியுள்ளது. மக்கள் உயிர்வாழத் தேவையான உட்கட்டமைப்பு, சுகாதாரம் மற்றும் நீர் உள்ளிட்ட அடிப்படை வசதிகளிலிருந்து சமூகங்கள் துண்டிக்கப்படுகின்றன,” என காஸாவுக்கான எல்லைகளற்ற மருத்துவர்கள் அமைப்பின் அவசரகால நடவடிக்கைத் தலைவர் அமண்ட் பசரோல் தெரிவித்துள்ளார்.

போர்நிறுத்தம் எனக் கூறப்பட்ட காலப்பகுதியிலும் வன்முறை தொடர்ந்ததாக எல்லைகளற்ற மருத்துவர்கள் அமைப்பு தெரிவித்துள்ளது. ஜூன் மற்றும் ஜூலை மாதங்களில் மட்டும் காஸா முழுவதும் 1,200க்கும் மேற்பட்ட வன்முறை தொடர்பான காயங்களுக்கு எல்லைகளற்ற மருத்துவர்கள் அமைப்பின் குழுக்கள் சிகிச்சை வழங்கியதாகக் கூறப்பட்டுள்ளது. கடந்த மூன்று ஆண்டுகளில், துப்பாக்கிச் சூடு, குண்டுவெடிப்பு, தீக்காயங்கள் உள்ளிட்ட வன்முறை காயங்களுக்காக 200,000க்கும் மேற்பட்டோருக்கு சிகிச்சை அளித்துள்ளதாகவும் எல்லைகளற்ற மருத்துவர்கள் அமைப்பு தெரிவித்துள்ளது.

மேலும், இஸ்ரேலின் இராணுவ நடவடிக்கைகளில் 74,000க்கும் மேற்பட்டோர் கொல்லப்பட்டுள்ளதாகவும், அவர்களில் 20,000க்கும் மேற்பட்டோர் குழந்தைகள் எனவும் எல்லைகளற்ற மருத்துவர்கள் அமைப்பு குறிப்பிட்டுள்ளது.

காஸாவில் மக்கள் நெருக்கடியான மற்றும் வாழ்வதற்கு பொருத்தமற்ற சூழலுக்கு தள்ளப்பட்டுள்ளதாகவும், சுத்தமான குடிநீர், சுகாதாரம், தங்குமிடம் மற்றும் மருத்துவ சேவைகளுக்கான அணுகல் போதுமானதாக இல்லை எனவும் எல்லைகளற்ற மருத்துவர்கள் அமைப்பு தெரிவித்துள்ளது.

இந்த ஆண்டில் மட்டும் சிரங்கு உள்ளிட்ட தோல் நோய்களால் பாதிக்கப்பட்ட 11,000க்கும் மேற்பட்டோருக்கு  சிகிச்சை வழங்கப்பட்டுள்ளதாகவும், ஜூன் மற்றும் ஜூலை மாதங்களில் சின்னம்மை நோயால் பாதிக்கப்பட்ட 1,500க்கும் மேற்பட்ட சம்பவங்கள் பதிவாகியுள்ளதாகவும் அந்த அமைப்பு தெரிவித்துள்ளது.

காஸாவில் சுகாதார கட்டமைப்பு கடுமையாக பாதிக்கப்பட்டுள்ளதுடன், 80 சதவீதத்துக்கும் அதிகமான கட்டிடங்கள் சேதமடைந்துள்ளதாகவும் எல்லைகளற்ற மருத்துவர்கள் அமைப்பு சுட்டிக்காட்டியுள்ளது. மருத்துவமனைகள், ஆம்புலன்ஸ்கள் மற்றும் நீர் விநியோக அமைப்புகளை இயக்குவதற்குத் தேவையான எரிபொருள், இயந்திர எண்ணெய் மற்றும் உதிரிப்பாகங்களுக்கான கட்டுப்பாடுகள் நிலைமையை மேலும் மோசமாக்கியுள்ளதாகவும் தெரிவிக்கப்பட்டுள்ளது.

இதனிடையே, 2023ஆம் ஆண்டு முதல் மேற்குக் கரை மற்றும் கிழக்கு ஜெருசலேமிலும் குடியேற்றவாசிகளின் தாக்குதல்கள், இராணுவ நடவடிக்கைகள், வீடுகள் இடிப்பு, இடம்பெயர்வு மற்றும் நடமாட்டக் கட்டுப்பாடுகள் அதிகரித்துள்ளதாக எல்லைகளற்ற மருத்துவர்கள் அமைப்பு தெரிவித்துள்ளது.

“கடந்த மூன்று ஆண்டுகளில் ஏற்பட்ட பாதிப்பிலிருந்து மீள்வதற்கு பல தலைமுறைகள் தேவைப்படும். அழிவு, இடம்பெயர்வு மற்றும் அடிப்படை தேவைகள் மறுக்கப்படுதல் ஆகியவை சாதாரணமாக்கப்பட்டுள்ளன. இஸ்ரேல் அழிப்பையும் கொலைகளையும் நிறுத்துவதையும், இனச் சுத்திகரிப்பைத் தடுப்பதையும், பாலஸ்தீன மக்களின் உயிர்வாழ்வுக்கான வழிகள் மறுக்கப்படுவதை முடிவுக்குக் கொண்டுவருவதையும் உறுதி செய்ய அரசாங்கங்கள் உடனடியாக நடவடிக்கை எடுக்க வேண்டும்,” என எல்லைகளற்ற மருத்துவர்கள் அமைப்பு அவசரகால நடவடிக்கைத் தலைவர் அமண்ட் பசரோல் தெரிவித்துள்ளார்.