வட மாகாணத்தில் மனிதாபிமான கண்ணிவெடி அகற்றும் நடவடிக்கைகளுக்கு ஜப்பான் ஆதரவு

இலங்கையின் வட மாகாணத்தில் முன்னெடுக்கப்படும் மனிதாபிமான கண்ணிவெடி அகற்றும் நடவடிக்கைகளுக்கு ஜப்பான் தொடர்ந்தும் ஆதரவை வழங்கி வருகிறது.

இதன் ஒரு பகுதியாக, அடிமட்ட மனித பாதுகாப்புத் திட்டங்களுக்கான மானிய உதவி (GGP) திட்டத்தின் கீழ் கண்ணிவெடி அகற்றும் திட்டத்திற்கான மானிய ஒப்பந்தம் செப்டெம்பர் 29ஆம் திகதி கைச்சாத்திடப்பட்டது.

இலங்கைக்கான ஜப்பான் தூதுவர் அகியோ இசொமதா மற்றும் Skavita Humanitarian Assistance and Relief (SHARP) நிறுவனத்தின் திட்ட முகாமையாளர் திரு. சரத் ஜயவர்தன ஆகியோர் இந்த ஒப்பந்தத்தில் கையெழுத்திட்டனர்.

இந்தத் திட்டத்திற்காக ஜப்பான் அரசாங்கம் 447,432 அமெரிக்க டொலர்களை (சுமார் 148 மில்லியன் ரூபாய்) வழங்கியுள்ளது. இந்த நிதியைப் பயன்படுத்தி இலங்கையின் வட மாகாணத்தில் மனிதாபிமான கண்ணிவெடி அகற்றும் நடவடிக்கைகளை SHARP நிறுவனம் முன்னெடுக்கவுள்ளது.

புதிய திட்டத்தின் கீழ் 190,000 சதுர மீற்றருக்கும் அதிகமான நிலப்பரப்பில் கண்ணிவெடிகள் அகற்றப்பட்டு, மக்கள் பயன்பாட்டுக்காக விடுவிக்கப்படும் என எதிர்பார்க்கப்படுகிறது.

இதன் மூலம் 7,000க்கும் மேற்பட்ட மக்கள் தங்களது சொந்த நிலங்களுக்கு மீளத் திரும்புவதற்கும், சுற்றியுள்ள பகுதிகளைச் சேர்ந்த சுமார் 11,500 மக்கள் தமது பொருளாதார நடவடிக்கைகளை விரிவுபடுத்துவதற்கும் வாய்ப்பு ஏற்படும் என தெரிவிக்கப்பட்டுள்ளது.

இலங்கையில் கண்ணிவெடி அகற்றும் நடவடிக்கைகளுக்கு 2002ஆம் ஆண்டு முதல் ஜப்பான் முக்கிய நன்கொடையாளராக இருந்து வருகிறது. இதுவரை இந்த நடவடிக்கைகளுக்காக ஜப்பான் வழங்கிய மொத்த நிதியுதவி 50 மில்லியன் அமெரிக்க டொலர்களைத் தாண்டியுள்ளது.

SHARP நிறுவனத்தின் தொடர்ச்சியான கண்ணிவெடி அகற்றும் பணிகளுக்கு நன்றி தெரிவித்த ஜப்பான் தூதுவர் அகியோ இசொமதா, இலங்கையின் போருக்குப் பின்னரான மீள்கட்டமைப்பு மற்றும் நல்லிணக்க முயற்சிகளில் ஜப்பான் உறுதியான பங்காளியாக இருந்து வருவதாக தெரிவித்தார்.

2002ஆம் ஆண்டு முதல், அதாவது உள்நாட்டுப் போர் நிறைவடைவதற்கு முன்னரிருந்தே, இலங்கையில் முன்னெடுக்கப்பட்ட பல்வேறு கண்ணிவெடி அகற்றும் திட்டங்களுக்கு ஜப்பான் 50 மில்லியன் அமெரிக்க டொலர்களுக்கும் அதிகமான நிதியுதவியை வழங்கியுள்ளதாகவும் அவர் குறிப்பிட்டார்.

வட மாகாணத்துக்கான அண்மைய விஜயத்தை நினைவுகூர்ந்த தூதுவர், வடக்கு மற்றும் கிழக்கு மாகாணங்களின் அபிவிருத்தியை மேலும் விரிவுபடுத்துவதற்காக கண்ணிவெடி அகற்றும் நடவடிக்கைகள் உள்ளிட்ட முயற்சிகளை துரிதப்படுத்த வேண்டியதன் அவசியத்தை வலியுறுத்தினார்.

மேலும், சிவில் சமூக அமைப்புகள், தனியார் துறை மற்றும் புலம்பெயர் சமூகத்தினரை உள்ளடக்கி, தற்போதுள்ள நன்கொடையாளர்களுக்கு அப்பால் ஆதரவு வட்டத்தை விரிவுபடுத்துமாறு இலங்கை அரசாங்கம் உள்ளிட்ட அனைத்து தரப்பினரிடமும் அவர் கோரிக்கை விடுத்தார்.

இதனிடையே, SHARP நிறுவனத்தின் திட்ட மேலாளர் சரத் ஜயவர்தன, 2016ஆம் ஆண்டு SHARP நிறுவனம் கண்ணிவெடி அகற்றும் நடவடிக்கைகளை ஆரம்பிப்பதற்கான ஆரம்ப நிதியை GGP திட்டத்தின் ஊடாக ஜப்பான் வழங்கியமைக்கு நன்றி தெரிவித்தார்.

2016 முதல் 2021ஆம் ஆண்டு வரை SHARP நிறுவனத்தின் ஒரே நிதியளிப்பாளராக ஜப்பான் இருந்ததாகவும், 2022ஆம் ஆண்டு முதல் அதன் பிரதான நன்கொடையாளராக தொடர்ந்து செயல்பட்டு வருவதாகவும் அவர் குறிப்பிட்டார்.