சந்தேகத்திற்கிடமான கடல்சார் நடவடிக்கைகளை கண்டறிய இலங்கை அதிகாரிகளுக்கு அமெரிக்கா பயிற்சி 

அமெரிக்காவின் பாதுகாப்பு நலன்களுக்கும் சட்டபூர்வமான உலகளாவிய வர்த்தகத்திற்கும் அச்சுறுத்தலை ஏற்படுத்தக்கூடிய கடல்சார் தடைகள் தவிர்ப்பு நடவடிக்கைகளை கண்டறிந்து அவற்றுக்கு பதிலளிக்கும் இலங்கையின் திறனை வலுப்படுத்தும் நோக்கில், அமெரிக்க தூதரகம் மூன்று நாள் பயிற்சித் திட்டமொன்றை கொழும்பில் நடத்தியுள்ளது.

அமெரிக்க இராஜாங்கத் திணைக்களத்தின் Cooperative Threat Reduction அலுவலகம், Atlantic Council உடன் இணைந்து இந்தப் பயிற்சியை செப்டெம்பர் 9 முதல் 11ஆம் திகதி வரை நடத்தியது.

இலங்கை அணுசக்தி ஒழுங்குமுறை பேரவை, இலங்கை மத்திய வங்கி, இலங்கை கடலோரக் காவல் படை, வணிகக் கப்பல் செயலகம், இலங்கை துறைமுக அதிகாரசபை, பாதுகாப்பு அமைச்சு மற்றும் இலங்கை கடற்படை உள்ளிட்ட நிறுவனங்களைச் சேர்ந்த 40க்கும் மேற்பட்ட அதிகாரிகள் இதில் பங்கேற்றனர்.

சந்தேகத்திற்கிடமான கப்பல்கள் மற்றும் ஏமாற்று கடல்சார் நடவடிக்கைகளை அடையாளம் காணுதல், தடைகள் மற்றும் பெருக்கல் தொடர்பான அபாயங்களை மதிப்பிடுதல், அத்துடன் இலங்கை கடற்பரப்பில் அல்லது அதனை அண்மித்த பகுதிகளில் சந்தேகத்திற்கிடமான கடல்சார் நடவடிக்கைகள் கண்டறியப்படும் போது அரச நிறுவனங்களுக்கு இடையிலான ஒருங்கிணைப்பை வலுப்படுத்துதல் ஆகியவற்றில் அதிகாரிகள் பயிற்சி பெற்றனர்.

இலங்கைக்கான அமெரிக்கத் தூதுவர் எரிக் மேயர், உலகளாவிய வர்த்தகத்தின் முக்கிய சந்திப்புப் பகுதியாக இலங்கை அமைந்துள்ளதால், அது குறிப்பிடத்தக்க வாய்ப்புகளையும் அதேவேளை விழிப்புணர்வுடன் செயற்பட வேண்டிய தேவையையும் கொண்டுள்ளதாக தெரிவித்தார்.

வர்த்தகக் கப்பல் போக்குவரத்தை தடைகள் தவிர்ப்பு வலையமைப்புகள் அதிகளவில் பயன்படுத்தி வருவதாகக் குறிப்பிட்ட அவர், இவ்வாறான வலையமைப்புகளை எதிர்கொள்வதற்கும், சட்டபூர்வமான வர்த்தகத்தை பாதுகாப்பதற்கும், முக்கியமான கடற்பரப்புகளின் பாதுகாப்பை உறுதிப்படுத்துவதற்கும், பிராந்திய பாதுகாப்பை வலுப்படுத்துவதற்கும் அமெரிக்காவின் நிபுணத்துவத்தை இலங்கை பங்காளிகளுடன் பகிர்ந்து வருவதாக தெரிவித்தார்.

Atlantic Council இன் தடைகள் மற்றும் கடல்சார் பாதுகாப்பு நிபுணர்கள் நடத்திய விளக்கங்கள் மற்றும் நடைமுறைப் பயிற்சிகள் மூலம், சட்டவிரோத கடல்சார் நடவடிக்கைகளை மறைப்பதற்காக பயன்படுத்தப்படும் பல்வேறு உத்திகள் குறித்து பங்கேற்பாளர்கள் ஆராய்ந்தனர்.

கப்பல்களின் அடையாளம் மற்றும் கண்காணிப்பு தகவல்களை மாற்றியமைத்தல், வெளிப்படைத்தன்மையற்ற உரிமையாளர் கட்டமைப்புகள், கப்பல்களுக்கு இடையிலான சரக்கு பரிமாற்றங்கள், போலி ஆவணங்கள் உள்ளிட்ட பல்வேறு ஏமாற்று நடைமுறைகள் இதில் அடங்குகின்றன.

மேலும், தடைகளுக்கு உட்பட்ட கப்பல்களுக்கு தெரிந்தோ தெரியாமலோ சேவைகளை வழங்கக்கூடிய கப்பல் முகவர்கள், எரிபொருள் வழங்குநர்கள் மற்றும் ஏனைய சேவை வழங்குநர்கள் எதிர்கொள்ளக்கூடிய அபாயங்கள் குறித்தும் அதிகாரிகளுக்கு விளக்கமளிக்கப்பட்டது.

அமெரிக்க தடைகள் மற்றும் பொருந்தக்கூடிய ஐக்கிய நாடுகள் பாதுகாப்புச் சபை தடைகள் தொடர்பாகவும் பயிற்சியில் கவனம் செலுத்தப்பட்டது. கப்பல்கள் மற்றும் அவற்றுடன் தொடர்புடைய நிறுவனங்கள் குறித்து உரிய விசாரணைகளை மேற்கொள்ளுதல், எச்சரிக்கை அறிகுறிகளை அடையாளம் காணுதல், நிதி மற்றும் பெருக்கல் அபாயங்களை மதிப்பிடுதல், இலங்கை அரச நிறுவனங்களுக்கு இடையில் ஒருங்கிணைந்த பதிலளிப்பு நடவடிக்கைகளை மேற்கொள்ளுதல் உள்ளிட்ட நடைமுறைத் திறன்களும் இதில் வழங்கப்பட்டன.

சட்டவிரோத நடவடிக்கைகளை மறைப்பதற்கும் சட்டபூர்வமான வர்த்தகத்தை பயன்படுத்திக் கொள்வதற்கும் தடைகள் தவிர்ப்பு வலையமைப்புகள் சிக்கலான சர்வதேச கப்பல் போக்குவரத்து மற்றும் நிதி கட்டமைப்புகளை அதிகளவில் பயன்படுத்தி வருவதாக அமெரிக்க தூதரகம் தெரிவித்துள்ளது.

இந்தியப் பெருங்கடலில் முக்கியமான கப்பல் சரக்கு பரிமாற்ற மையமாக இலங்கை விளங்குவதால், சட்டவிரோத கடல்சார் நடவடிக்கைகளிலிருந்து நாட்டின் துறைமுகங்கள் மற்றும் கடற்பரப்புகளை பாதுகாப்பது சட்டபூர்வமான வர்த்தகத்தை உறுதி செய்வதில் முக்கியத்துவம் வாய்ந்ததாகும்.

இலங்கை அதிகாரிகளின் கடல்சார் பாதுகாப்புத் திறனை மேம்படுத்துவதையும், சாத்தியமான சட்டவிரோத கடல்சார் நடவடிக்கைகளை கண்டறிந்து அவற்றுக்கு பதிலளிக்கும் திறனை வலுப்படுத்துவதையும் நோக்கமாகக் கொண்ட அமெரிக்கா–இலங்கை ஒத்துழைப்பின் ஒரு பகுதியாக இந்தப் பயிற்சி இடம்பெற்றுள்ளது.